CEO клуб “Оюу толгой” ХХК-ийн гүйцэтгэх захиралтай уулзлаа
clock2017-12-12 13:25
CEO клуб “Оюу толгой” ХХК-ийн гүйцэтгэх захиралтай уулзлаа
Нээлттэй, ойлгомжтой, тогтвортой бизнесийн орчин бий болгох замаар Монгол Улсаа амьдрах таатай орчин бүрдсэн жишиг орон болгох алсын хараатай байгуулагдсан “СЕО” клуб үүсгэн байгуулагдаад 10 жил болжээ. Тус клуб сар бүр гишүүддээ зориулан уулзалт, хэлэлцүүлэг зохион байгуулдаг бөгөөд энэ удаа “Оюу толгой” ХХК-ийн гүйцэтгэх захирал Армандо Торрестой уулзлаа.

“Эрдэс баялгаас эрдэм мэдлэг, ур чадвар, үнэт зүйлс бүтээлцэнэ” хэмээх уриатай “Оюу толгой” ХХК-д өнөөдрийн байдлаар 13 мянган хүн ажиллаж байна. Нийт ажилчдын 94 хувийг Монгол ажилтнууд бүрдүүлж байгаагаас гадна олон Монгол залуус гадаадын уурхайнуудад уригдаж ажиллаж эхэлжээ. Сүүлийн долоон жил Монгол Улсын засгийн газарт нийт 6.7 тэрбум ам.долларыг төвлөрүүлээд байгаагаас гадна 5.3 тэрбум ам.долларын өртөгтэй гүний уурхайн төслөө эхлүүлж, 2020 оноос үйлдвэрлэлээ эхлүүлэхээр ид ажиллаж байна.

Ялангуяа гүний уурхайн бүтээн байгуулалт дээр Монгол компаниудыг дэмжин ажиллах тусгай бодлого явуулж байгаа бөгөөд одоогийн байдлаар Монгол компаниудтай 1.2 тэрбум ам.долларын гэрээг байгуулаад байна. Тус компани нь энэ зорилгынхоо хүрээнд “Монголд үйлдвэрлэв” стратегийг боловсруулан хэрэгжүүлж буй бөгөөд 2017 оны 3-р улирлын байдлаар “Оюу толгой” ХХК-ийн үйлдвэрлэлийн худалдан авалтын 82 хувийг Монгол Улсаас, 68 хувийг үндэсний ханган нийлүүлэгчдээс бүрдүүлээд байна. Нэмүү үнэ цэнийг Монголдоо бий болгох зорилтын хүрээнд ган бөмбөлөг, нунтаг шохой, баяжмалын уут, ажлын хувцас, баяжмалын тээвэрлэлийг 100 хувь Монголчууд хариуцан хийж байна. Зөвхөн 2017 онд Өмнөговь аймаг дахь худалдан авалтын нийт дүн 80 орчим сая ам.долларт хүрэхээр байгааг Армандо Торрес захирал онцлон тэмдэглэв.

Нийт худалдан авалтынхаа дийлэнх хувийг үндэсний компаниудад зарцуулж буй хэдий ч тухайн компаниуд яг Монголдоо үнэ цэнэ бий болгож чадаж байгаа эсэх дээр онцгой ач холбогдол өгч ажиллаж байна. Үүний тулд Оюу толгой нь боломжит болон гэрээт ханган нийлүүлэгчдийг хөгжүүлэн чадавхижуулах үйл явцад гуравдагч талуудтай хамтран зохион байгуулагчийн үүрэгтэй оролцож, аюулгүй байдал, бизнесийн ёс зүй, техникийн дэмжлэг, чанарын баталгаажуулалт, хяналт, санхүүгийн хүртээмж зэрэг талбаруудад мэргэжлийн зөвлөгөө өгч хамтран ажиллаж байгаа талаар худалдан авалтын газрын бодлогын менежер Г.Батбаатар дэлгэрэнгүй танилцуулав.

2018 онд “CEO” клуб болон “Оюу толгой” ХХК улам нягт хамтран ажиллахаа баталгаажуулж, үндэсний компаниудын оролцоог нэмэгдүүлэх, олон нийтэд мэдлэг, мэдээлэл түгээх, Монголын эдийн засгийн форумыг хамтран зохион байгуулах зэрэг олон ажлууд дээр саналаа солилцлоо. “CEO” клубын зорилго нь Монгол Улсын эдийн засаг, хууль зүйн таатай орчинг бүрдүүлэх, хувийн хөгжлийг шинэ шатанд гаргах, дэмжин урамшуулахад чиглэсэн бодлого боловсруулахад төрийн байгууллагуудтай хамтран ажиллах, бодлогын баримт бичигт тусгуулах, мөн Монгол Улсад шинэ санал санаачлагыг нэвтрүүлэхэд аж ахуйн нэгжүүдийн “СЕО” буюу захирлуудын нэгдмэл санааг Улсын их хурал, Засгийн газарт илэрхийлэн хамгаалах, нийгэмд чиглэсэн үйл ажиллагаа явуулах, төр хувийн хэвшлийн түншлэлийн (ТХХТ буюу РРР) механизм бий болгох, байнга сайжруулах нэгдмэл хүчирхэг лобби клуб байхад оршино.