CEO клубын ээлжит уулзалтад Д.Цогтбаатар сайд оролцлоо
clock2017-11-17 22:00
CEO клубын ээлжит уулзалтад Д.Цогтбаатар сайд оролцлоо
Монголын гүйцэтгэх захирлуудын нэгдэл буюу CEO клубын гишүүд өчигдөр Гадаад харилцааны сайд Д.Цогтбаатарыг урьж ярилцлаа. Тус клуб нь Монголын эдийн засаг, бизнесийн таатай орчинг бүрдүүлэх чиглэлээр Засгийн газарт хувийн хэвшлийнхний санал санаачилгыг илэрхийлэгч лобби нэгдэл юм.

Уулзалтад CЕО клубын ерөнхийлөгч, Ард санхүүгийн нэгдлийн захирал Ч.Ганхуяг, тус клубын захирал, Бат солюшн партнерс компанийн УЗ-ийн дарга В.Ганзориг, клубын гишүүд болох МCS группийн гүйцэтгэх захирал Л.Гантөмөр, Mongolian Opportunity Fund-ийн гүйцэтгэх захирал Б.Батсайхан, Петровис Ойл компанийн ерөнхий захирал С.Энх-Амгалан, Ньюком группийн ерөнхий захирал Н.Энхболд, Делойтте компанийн ерөнхий захирал Д.Ончинсүрэн, БСБ сервис компанийн гүйцэтгэх захирал Б.Жаргалсайхан, Голомт банкны ерөнхийлөгч Г.Ганболд, Сүү компанийн гүйцэтгэх захирал Б.Гантулга нар оролцсон.

СЕО клубын гишүүдийн хувьд шинэ Засгийн газрын Гадаад харилцааны сайд Д.Цогтбаатараас гадаад худалдааг хөнгөвчлөх, татварын таатай орчин бүрдүүлэх, дотоодын хувийн хэвшлийнхнийг дэмжих талаар төрөөс баримталж байгаа бодлогын талаар тодруулсан. Мөн гадаад худалдаа эрхлэхэд хүндрэл үүсгэж байгаа практикт тулгарч буй шалтгаануудыг танилцуулсан юм.

Гадаад харилцааны сайд Д.Цогтбаатар төр, хувийн хэвшлийн түншлэлийг сайжруулах, үндэсний аж ахуйн нэгжийг дэмжих, худалдааг хөнгөвчлөх талаар цаашид анхаарч ажиллахаа илэрхийлснээс гадна Монголын уул уурхайн бус салбар, тэр дундаа жижиг дунд үйлдвэрлэлийг дэмжихэд өөрийн зүгээс хичээж ажиллахаа илэрхийлсэн.

Гадаад харилцааны яам Монголын эдийн засгийн хөшүүрэг байх болно гэдгээ бизнес эрхлэгчдийн өмнө амлалаа. “Та нарын мөнгөөр бид цалинждаг хүмүүс. Тийм учраас та нарын үгийг сонсч, хамтран ажиллах нь зайлшгүй бидний үүрэг. Ийм учраас практик дээр та нар төрийг шахаж, дуу хоолойгоо илэрхийлэх ёстой. Бизнесийнхний дуу хоолой сул байна. Дарга нарыг сонсохоос илүүтэйгээр тэдэнд ажил хэрэгч, бодитой санал тавьж шахаж ажилла. Дээрээс нь үндэсний брэнд гэдэг чухал. Брендинг хийхийн тулд бэлэн бүтээгдэхүүнтэй байх ёстой. Энэ бүтээгдэхүүнийг бий болгож, дэлхийд таниулах нь үндэсний томоохон компаниудын нийгмийн хариуцлага юм” гэж Д.Цогтбаатар сайд хэлэв. Монголын гүйцэтгэх захирлуудын нэгдлийн гишүүд өнөөдөр Сангийн сайд Ч.Хүрэлбаатарыг уулзалтандаа урьж, эдийн засаг, татвар, төсөв санхүүгийн бодлого, төр-хувийн хэвшлийн түншлэлийн асуудлаар ярилцах юм.