"CEO" Клуб -ын гишүүд Монгол Улсын Их Хурлын Дарга Г.Занданшатар, Монгол Банкны Ерөнхийлөгч Б.Лхагвасүрэн, Санхүүгийн зохицуулах хорооны дарга Д.Баярсайхантай уулзлаа.

"CEO" Клуб нь Hawes & Curtis Mongolia брэндийн Монгол дахь албан ёсны төлөөлөгч "JERMYN ST" ХХК-тай түнш байгууллагаар хамтран ажиллах гэрээнд гарын үсэг зурлаа.

CEO Club нь Монголын Эдийн Засгийн Форумын хүрээнд #Бизнес уулзалтыг амжилттай зохион байгууллаа.

"CEO" Клубын ерөнхийлөгч Б.Гантулга Монголын Эдийн Засгийн Чуулган 2023 -нд "Бизнесийн болон Хөрөнгө оруулалтын орчин" сэдвээр урьдчилсан хэлэлцүүлэгт оролцлоо

Тус уулзалтаар Монгол Улсын хилийн боомтуудын үйл ажиллагааны чанар, хурдыг сайжруулах иргэдийн амьдрал, эдийн засаг, хувийн хэвшилд үзүүлэх хүлээлт, чирэгдлийг бууруулах тал дээр мэдээлэл, санал солилцсон юм. Сайдын зүгээс ойрын хугацаанд боомтуудын үйл ажиллагааны цагийг нэмэгдүүлэх, нэвтрүүлэх хурдыг сайжруулах, үйл ажиллагааг чанаржуулах тал дээр хийгдэж байгаа болон төлөвлөж байгаа ажлуудыг танилцууллаа. CEO Club-ын гишүүдийн зүгээс шинээр байгуулагдсан Боомтын сэргэлтийн үндэсний хороо нь хувийн хэвшлийнхний он удаан жил хүсэж, хүлээж байсан Худалдааны асуудал эрхэлсэн яамны чиг үүрэгтэй давхцаж байгааг онцлоод, энэ чиглэл дээр төрийн зүгээр хариуцсан эзэнтэй болж байгаад талархалтай байгаагаа илэрхийллээ.

Тус уулзалтаар Монгол Улсад нүүрлээд байгаа ажиллах хүчний хомсдол, одоогийн мөрдөгдөж байгаа халамжийн бодлогыг хөдөлмөр суурьт шилжүүлэх, иргэдийн хөдөлмөр эрхлэх сонирхол, хөшүүргийг нэмэгдүүлэх, мөн нийгмийн даатгалын шимтгэлийн хэмжээг нэмэгдүүлэхгүйгээр бүтцийг өөрчлөх, богино хугацаанд үр өгөөж хүртэх эрүүл мэндийн даатгалын шимтгэл хураамжийн хувийг нийгмийн даатгалын шимтгэл дотор нэмэгдүүлж эрүүл мэндийн үйлчилгээний чанар, хүртээмжийг сайжруулах талаар санал бодлоо солилцов. Тэтгэврийн олон тулгуурт тогтолцоог бий болгох ажлыг хувийн хэвшил сайн дурын үндсэн дээр эхлүүлж хуримтлал дээр суурилсан тэтгэврийн тогтолцоог Монгол Улсад таниулах, төлөвшүүлэх, ирээдүйд иргэдэд үүсэж болох эрсдэлийг бууруулахын тулд хууль эрх зүйн орчин, зохицуулалт шаардлагатай байгаа талаар мөн тусгайлан ярилцав. Сайдын зүгээс иргэдийн цалин орлого нэмэгдүүлэх, ажилчдын ажиллах орчныг сайжруулах, хямд хүртээмжтэй орон сууцны хөтөлбөрт хамрагдах боломжийг бий болгох тал дээр хувийн хэвшлийг идэвх санаачилгатай ажиллахыг хүссэн бөгөөд шаардлагатай бодлого, зохицуулалтаар дэмжин ажиллахаа илэрхийллээ. Уулзалтад СЕО клубын ерөнхийлөгч, Улаанбаатар Үнэт Цаасны Биржийн гүйцэтгэх захирал Б.Гантулга, клубын гишүүн Таван Богд группын ерөнхийлөгч Ц.Баатарсайхан, Онч Аудит компанийн гүйцэтгэх захирал Д.Ончинсүрэн, Рио Тинто компанийн гүйцэтгэх захирал Х.Амаржаргал, Оюуны Ундраа группын гүйцэтгэх захирал О.Тэнүүн, Түмэн шувуут ХК-ийн гүйцэтгэх захирал Ж.Болд, Би Эс Пи компанийн ТУЗ-ийн дарга В.Ганзориг, Тэсо группын гүйцэтгэх захирал С.Болор, Монголиан опортюнити фанд компанийн гүйцэтгэх захирал Б.Батсайхан, Би Ту Брос компанийн гүйцэтгэх захирал Д.Энхтүвшин, Лхамур компанийн гүйцэтгэх захирал Д.Хулан, Оюу Толгой компанийн Хамтын ажиллагаа, мэдээлэл харилцаа хариуцсан захирал Э.Лхагва, Улаанбаатар худалдааны танхимын гүйцэтгэх захирал Б. Хаш-Эрдэнэ, MCS группын Төрийн ба төрийн бус байгууллагын харилцаа хариуцсан захирал Б.Жавхлан нар ороцлоо.

Монголчууд бидэнд аялал жуулчлалыг хөгжүүлж ихээхэн хэмжээний ажлын байр бий болгох боломж байгаа тухай мөн өвлийн аялал жуулчлал, байгаль орчны бусад асуудлаар ярилцлаа.

"CEO" Клубийн ээлжит уулзалт боллоо

CEO клуб Америкийн Нэгдсэн Улсаас Монгол Улсад суугаа Онц бөгөөд Бүрэн эрхт Элчин сайд Ричард Буанган болон түүний эдийн засгийн зөвлөх Жон Чен нарыг хүлээн авч уулзан Монгол улсын эдийн засаг, бизнесийн орчин, сорилтуудыг ярилцан хөрөнгө оруулалтын боломжуудын талаар чөлөөтэй санал солилцлоо.

Монголын гүйцэтгэх захирлуудын СЕО Клуб Нийслэлийн Засаг Дарга бөгөөд Улаанбаатар хотын Захирагч Д. Сумъяабазар болон түүний ажлын албатай нийслэлийн түгжрэлийг бууруулах шийдлийн талаар уулзалт зохион байгууллаа.

Б. Гантулга нь Улаанбаатар Үнэт Цаасны Биржийн гүйцэтгэх захирал бөгөөд хувийн хэвшлийн салбарт 20 орчим жил ажиллахдаа Монгол Улсын ТОП 100 аж ахуйн нэгжид багтах компаниудыг амжилттай удирдаж ирсэн.

Хотын дарга Монголын гүйцэтгэх захирлуудын “СЕО” клубийн төлөөлөгчидтэй уулзлаа Монгол Улсын эдийн засгийг нуруундаа үүрч яваа үндэсний үйлдвэрлэгчид, чадварлаг удирдагч нарын нэгдэл болсон Монголын гүйцэтгэх захирлуудын “СЕО” клубийн төлөөлөгчидтэй Нийслэлийн Засаг дарга бөгөөд Улаанбаатар хотын Захирагч Д.Сумъяабазар өнөөдөр уулзлаа. “СЕО” клуб нь Монгол Улсад эдийн засаг, хууль зүйн таатай орчныг бүрдүүлэх, хувийн хэвшлийн хөгжлийг шинэ шатанд гаргах, нийгэмд чиглэсэн үйл ажиллагаа явуулах, төр, хувийн хэвшлийн түншлэлийн механизм бий болгох зорилготой аж. “Энэ зорилго нь Улаанбаатар хотыг бизнес эрхлэхэд таатай орчинтой болгох, эдийн засгийг сэргээх зорилготой нийцэж байгаа тул бид нэг зүгт харах ёстой” гэж Хотын дарга уулзалтын үеэр онцолсон. https://ulaanbaatar.mn/news/62175ee48c8b7d33e639ec5d

Монгол Улсын эдийн засгийн хөдөлгүүрийн 80 орчим хувь хувийн хэвшил дээр суурилдаг. Зах зээлийн эдийн засгийн үндэс болсон бизнес эрхлэгч, аж ахуйн нэгжүүд хөдөлмөр эрхлэгчдийн мөн 80 гаруй хувийг шууд ажлын байраар хангадаг. Энэ хэрээр цар тахлын хүнд үед улсын төсвийн орлогыг татвар, шимтгэлээр бүрдүүлж нийгэм, эдийн засагт хамгийн том хувь нэмэр оруулж байна. Харамсалтай нь сүүлийн жилүүдэд томоохон бизнес эрхлэгчид, татвар төлөгчдийн эрхэнд халдах, бизнесийн нэр хүндийг гутаан доромжлох, тэр байтугай зарим салбарын үйл ажиллагааг төр авч явах ёстой тухай хандлага эрс нэмэгдэж байна. Эдгээр хандлагыг баталгаажуулсан хууль, журмуудыг төрийн байгууллагуудаас санаачлан, УИХ-ын дэд даргаас авахуулаад төрийн өндөр албан тушаалтнууд үндэслэлгүй мэдээлэл, ёс зүйгүй мэдэгдэл хийж буйг бид цаашид хүлээн зөвшөөрөхгүй. Үүний хамгийн сүүлийн жишээ бол Монгол Улсын Их Хурлын намрын ээлжит чуулганы хуралдааны үеэр УИХ-ын гишүүн Ц.Даваасүрэнгийн “... бизнесменүүд хулгай, дээрмээр мөнгө олдог учраас залхуу. Тэд хөдөлмөрлөж мөнгө олоогүй ...” гэх мэтээр хэлж олон мянган бизнес эрхлэгчийн нэр хүнд, үндэсний компаниудын нөр их хөдөлмөрийг доромжиллоо. Энэ бол баялаг бүтээн татвар төлдөг бидний бизнесийн эрхэнд бүдүүлгээр халдаж буй увайгүй үйлдэл гэж бид жигшин харж байна. Хэрвээ энэ хандлага, үйлдэл энэ мэтээр даамжирвал цар тахлын хүндрэлтэй тулгараад байгаа энэ цаг үед ажлын байраа хадгалж, бизнесээ тогтвортой эрхлэхийн төлөө чармайн хөдөлмөрлөж байгаа нийт бизнес эрхлэгчдийн үйл ажиллагааг тэр чигээр нь үгүйсгэж, нийгэмд талцал үүсгэн үл ойлголцлыг өдөөж, цаашилбал эдийн засаг, нийгмийн салбар бүрт маш том сөрөг зүйлийг дагуулах болно. Иймд иргэдийг төлөөлөх үүрэгтэй “эрхэм” гишүүд та бүхэн энэ бүдүүлэг үйлдэлдээ дүгнэлт хийн хариуцлага хүлээж, хувийн хэвшил, бизнес эрхлэгчдээс албан ёсоор уучлалт гуйхыг шаардаж байна. Татвар төлөгч бидний мөнгөөр цалинжин, төрийн өндөр үүрэг хариуцлагыг сонгогч олон, ард түмнийхээ төлөө үүрч буй албан тушаалтнуудын хэлсэн үг, үйлдэл бүр дотооддоо Монгол төрийг төлөөлдөг төдийгүй гадаад ертөнцөд төрийн бодлогыг илэрхийлдэг. Энэ том үүрэг, хариуцлагаа ухамсарлан та бүхнийг дахин ийм үйлдэл гаргахгүй гэдэгт итгэж байна. УЛААНБААТАР ХОТЫН ХУДАЛДААНЫ ТАНХИМ ГҮЙЦЭТГЭХ ЗАХИРЛУУДЫН КЛУБ 2021 оны 11-р сарын 10-ны өдөр

CEO клуб УИХ-ын гишүүн, инноваци, цахим бодлогын байнгын хорооны дарга Н.Учралтай уулзаж, цахим хөгжлийн багц хуулиудын үзэл баримтлал, концепцийн талаар мэдээлэл солилцож, санал дүгнэлтээ ярилцлаа. Түүнчлэн Мэргэжлийн холбоодын тухай хуулийн үндэслэл, агуулгыг хувийн хэвшлийн төлөөлөлтэй хэлэлцэж мэдээлэл өглөө.

Эдийн засгийн хөгжлийг хангах, 2020 онд цар тахлаас болж 5.6 хувь орчмоор агшсан Монгол улсын эдийн засгийг буцаан тэлэхэд нөлөөлөх хамгийн гол хүчин зүйл бол улс төрийн тогтвортой орчин дахь бизнесийн тасралтгүй, бүтээлч үйл ажиллагаа байх ёстой. Өдрөөс өдөрт хүндэрч байгаа цар тахлын нөлөөгөөр Монгол Улсaд төдийгүй дэлхий нийтэд бизнесийн орчин улам муудаж, олон улсад төр засаг нь ард түмнийхээ эрүүл мэндийг хамгаалахaд бүхий л нөөц бололцоогоо дайчлахын зэрэгцээ эдийн засагаа аврах, эдийн засаг, бизнесээ унагаахгүй авч гарах том сорилт тулгарч байна. Энэ сорилт биднийг тойроогүй бөгөөд Монголын бизнесийг тогтвортой байлгах, улмаар сайжруулах боломжит бүх арга замыг төр засаг, хувийн хэвшлийнхэн аль аль нь эрэлхийлж, зарим арга хэмжээ авч хэрэгжүүлж байгаа нь хувийн хэвшлийнхэн, ажил олгогч, ажилчдад тодорхой хэмжээнд эерэгээр нөлөөлж байна. Гэтэл эдгээр арга хэмжээний нөлөөлөл дөнгөж гарч эхэлж байгаа энэ цаг үед бизнесийн орчинд хамгийн их нөлөөлдөг улс төрийн тогтворгүй байдал үүсч байгаад татвар төлөгч, ажлын байр бүтээгч, бизнес эрхлэгчид бид туйлын харамсаж байна. Улс төрийн тогтворгүй байдал бий болох нь бизнесийн орчинд сөргөөр нөлөөлөхөөс гадна цар тахалд туйлдан ядарч байгаа ард түмний амьдрал, эв нэгдэл, цар тахлын эсрэг зогсох бидний хамтын тэмцэлд ч сөргөөр нөлөөлөх аюултай гэдгийг улстөрчид мэдэж байгаа гэдэгт итгэж байна. Иймээс Монгол Улсын төсвийг бүрдүүлэгч, татвар төлөгч, ажил олгогчид бид улс төрийн бүх намууд, төрийн бүх институциудад хандан ард түмний эв нэгдлийг хангах, цар тахлын эсрэг хамтран тэмцэх, эдийн засгаа идэвхжүүлэх, гадаад хөрөнгө оруулалтыг татах, бизнесийн орчныг тогтвортой байлгах боломжит бүх арга хэмжээг авч хэрэгжүүлэх, нийтийг хамарсан үймээн самуун, бослого, хөдөлгөөн, хууль бус тэмцэл, нийгмийн эмх замбараагүй байдлыг өөгшүүлэхгүй, хувь хүний эрх болон бизнесийн эрх, эрх чөлөөг хамгаалах үүднээс нэн даруй зөвшилцөлийн ширээний ард суухыг улстөрчдөд УРИАЛЖ байна. УЛААНБААТАР ХОТЫН ХУДАЛДААНЫ ТАНХИМ МОНГОЛЫН ГҮЙЦЭТГЭХ ЗАХИРЛУУДЫН КЛУБ 2021 оны 4-р сарын 22-ны өдөр

Хувийн хэвшлийн өмнө тулгамдаж буй асуудлуудыг онцгой дэглэмийн өнөөгийн нөхцөлтэй уялдуулан шийдвэрлэх арга замын тухай Юуны түрүүнд улс орныг цочирдуулж, урьд өмнө тохиолдож байгаагүй онцгой нөхцөл байдал үүсч, бүх нийтийн хөл хорио тогтоож, онцгой байдлаар ажиллаж байгаа та бүхэнд нийт гишүүд, хувийн хэвшлийнхний нэрийн өмнөөс талархал илэрхийлье. КОВИД-19 Монгол Улсын дотоодод халдварлаж, хүн ардыг заналхийлж байгаа энэ үед Засгийн Газраас хөл хорио тогтоон, зохион байгуулалттайгаар цогц арга хэмжээ авч хэрэгжүүлж буйтай холбогдуулан бизнес эрхлэгч, ажил олгогчдын зүгээс тодорхой саналуудыг хүргүүлж байна. Бүх нийтээрээ хөл хорионд орж, бизнес эрхлэх нөхцөл байдал хурцдаж байгааг юуны түрүүнд та бүхэнд мэдээллэх нь зүйтэй болов уу. Бизнес зогссоноор цалин зогсож, иргэдийн худалдан авах чадвар эрс доройтож, эргээд худалдан авах чадвар үгүй болсноор бизнесийн борлуулалт үгүй болно. Үүнээс шалтгаалан улсын төсөвт төлдөг татвар, хураамжаа бид төлөх боломжгүй болсноор төрийн ажил үйлчилгээ удаашрах, зогсох, төрийн албан хаагчдын цалин, тэтгэвэр тэтгэмж тавигдах боломжгүй болж, эргээд бизнесийн борлуулалтанд нөлөөлдөг гамшгийн гинжин урвал эхлэх нөхцөл байдал үүсээд байна. Иймээс бид шинээр үүсээд буй эгзэгтэй энэ нөхцөлд улс орны эдийн засгийг хүндрэлд оруулахгүй, бизнес эрхлэлтийг тогтвортой байлгах замаар олон мянган иргэдийн ажлын байрыг хадгалж байх зорилгоор дараах тодорхой саналуудыг хүргүүлж байна. Үүнд: - Улсын Онцгой Комиссын дэргэд хувийн хэвшил, иргэний нийгэм, эрдэмтэн судлаачдын төлөөлөл бүхий “Эдийн засгийн зөвлөл” байгуулан цар тахлын тархалтыг бууруулах, зогсоохтой холбоотойгоор эдийн засаг, бизнесийн салбарын талаар авах арга хэмжээг төлөвлөх, батлах, хэрэгжүүлэхдээ энэ зөвлөлийн санал, дэмжлэгийг авдаг болох. - Хөл хорионы дэглэмийн үед аж ахуйн нэгж, байгууллагуудын үйл ажиллагааг тодорхой стандартын дагуу явуулах боломжийг гаргаж өгөн цаашид ч хөл хөдөлгөөнийг бүрэн хаахаасаа илүүтэй энэхүү стандартынхаа дагуу ажиллах өргөн боломжийг нээлттэй байлгах. - Аж ахуйн нэгж, хувь хүмүүсийн орлого буурсантай холбоотойгоор банкны зээлийн төлбөрийг төлөх хугацаа, хэмжээ, зээлийн хүүний төлбөр зэрэгт хөнгөлөлт үзүүлэх, тодорхой журмын дагуу хөнгөлөлт үзүүлж, дэмжих. - Том, жижиг бүх аж ахуйн нэгж, бизнес эрхлэгчид түрээсийн төлбөрийн ихээхэн өрөнд орж байгаа тул эдгээр аж ахуйн нэгж, бизнес эрхлэгчдэд (1) төсвөөс нэг удаа түрээсийн төлбөрийг нь төлж өгөх, эсвэл (2) түрээслүүлж байгаа ажлын байрны ус, дулаан, цахилгааны төлбөрийг төсвөөс нэг удаа хөнгөлж өгөн тэр хэмжээгээр түрээслэгч нартаа хөнгөлөлт үзүүлэхийг даалгах. - Бүх төрлийн үйлдвэр, аж ахуйн нэгжүүдийн үйлдвэрийн газрын тогтмол зардал болох цахилгаан эрчим хүч, ус, дулааны зардлын тодорхой хувийг хөнгөлөх. - Ажлын байраа хадгалж үлдсэн аж ахуйн нэгж, байгууллагуудын ажилчдын цалингийн 50-60 хувийг цар тахлын халдвар зогсох хүртэл улсын төсвөөс олгох. - Аж ахуйн нэгж, байгууллагуудын ажилчдынхөө өмнөөс төлж байгаа нийгмийн даатгалын шимтгэлийг төлөлтийг цар тахлын халдвар зогсох хүртэл зогсоох. - Өнөөдрийг хүртэл үүсээд байгаа бүх төрлийн татвар, нийгмийн даатгалын шимтгэлийн өр төлбөрийг 6 сараар хойшлуулах, торгууль, анз тооцож суутгахыг зогсоох. - Хөл хориотой холбоотойгоор борлуулалтын орлого нь буурч алдагдалд орсон аж ахуйн нэгж, байгууллагуудын алдагдлыг нөхөж өгөх тусгай санг төсвийн хөрөнгөөр яаралтай байгуулан энэ сангаас аж ахуйн нэгжүүдэд нөхөн олговор олгох. Энэ ажилд мэргэжлийн холбоод, танхимыг татан оролцуулах. - Хөрөнгө оруулалтаа босгон үйл ажиллагаагаа эхлэхэд бэлэн болсон хувийн хэвшлийн хөрөнгө оруулалттай том, жижиг төслүүдийг тодорхой стандартын шаардлагыг хангуулан ажлыг нь эхлүүлэх Урт хугацаанд эдийн засаг, бизнесийн тогтвортой байдлыг хадгалах зорилгоор дараах арга хэмжээнүүдийг авч хэрэгжүүлэхийг санал болгож байна. Үүнд: - Монгол банкны бодлогын хүүг бууруулах замаар зээлийн хүүг бууруулах, хувийн хэвшилд олгох арилжааны зээлийн хэмжээг нэмэгдүүлэх уян хатан тогтолцоог яаралтай бүрдүүлэн хэрэгжүүлэх. - Ажлын байраа хадгалж үлдэхэд нь зориулж аж ахуйн нэгжүүдэд зориулан 2021 оныг дуустал зээлийн эргэн төлөлт хийгдэхгүй байх, маш бага хүүтэй зээлийг яаралтай олгож эхлэх. - Уул уурхайн түүхий эд, бүтээгдэхүүний экспортыг цаашид зогсоохгүй байх зорилгоор хэрэгжүүлж байгаа өнөөгийн дэглэмийг үргэлжлүүлэн хэрэгжүүлэх, зогсоохгүй байх. - Томоохон татвар төлөгчид болох уул уурхайн болон дэд бүтцийн томоохон төслүүд дээр ажиллах цөөн тооны өндөр зэрэглэлийн гадаадын мэргэжилтнүүдийг хөл хорионы өнөөгийн хэрэгжиж буй дэглэмийн дагуу улсын хилээр нэвтрүүлж оруулж ирүүлэх дэглэмийг үргэлжлүүлэх. - Төрийн худалдан авалтын бодлогоор дотоодын үйлдвэрлэгчдийн бүтээгдэхүүн, үйлчилгээг илүү ихээр худалдан авах, төсвийн хөрөнгө оруулалтад тусгагдсан үр ашиг муутай, 2021 онд шинээр хийж эхлэх хөрөнгө оруулалтуудыг цуцлах. Хувийн хэвшлийнхэн, бизнес эрхлэгчид бид улс оронд нүүрлээд байгаа цар тахлын аюултай тэмцэх, зогсооход бүхий л талаар хамтран ажиллахад бэлэн байгаагаа илэрхийлж байна. Улаанбаатар хотын удалдааны танхим Гүйцэтгэх захирлуудын клуб (CEO Club) Монголын бизнесийн зөвлөл (BCM)

Бизнесийн холбоод Австралийн элчин сайдтай уулзаж хоёр улсын харилцаа, эдийн засаг, нийгмийн талаар маш сайхан чөлөөтэй ярилцлага өрнүүллээ. Өнгөрсөн долоо хоногт уулзахад АНУ-ын элчин сайд Монгол Улсыг Индо Пасификийн чухал түнш гэж хэлж байсан бол Австрали улс Монголыг Ази, номхон далайн бүсийн ардчиллын гол түншүүдийн нэг гэдгийг онцолж байна. Австралид 6000 Монгол оюутан суралцаж байгаа бөгөөд уул уурхайгаас гадна технологи, ХАА, аялал жуучлал, боловсролын салбарт хамтдаа хийх олон ажил байгааг ярилцав. Нөхцөл шаардлагыг нь богино хугацаанд хангаж чадвал анх удаа хоёр улсын хооронд хийгдсэн шууд нислэг тогтмол болоход ч ойрхон байна.

CEO клуб АНУ-аас Монгол Улсад суух Элчин сайд С. Клеческитэй уулзаж хоёр улсын бизнес, эдийн засгийн харилцаа, сорилт, боломжуудын талаар мэдээлэл солилцлоо. Ноён элчин сайд Монгол Улсын гуравдагч хөршийн бодлогыг эрхэмлэж явдгаа илэрхийлэхийн сацуу эдийн засгийн харилцан ашигтай хамтын ажиллагаа элчин сайдын яамны хамгийн чухал асуудал гэдгийг онцолж байв. Бизнесийн орчныг сайжруулах, гадаадын хөрөнгө оруулалтыг дэмжих, хууль шүүхийн хараат бус, ил тод байдлыг төгөлдөржүүлэхэд талууд нээлттэй хамтран ажиллахаар тохиролцлоо.

Улаанбаатар Хотын Худалдааны Танхим, CEO Клуб нь бизнес эрхлэгчдийн нийтлэг эрх ашгийг хамгаалах үндсэн чиг үүргийнхээ дагуу анхан шатны шүүхээс манай үүсгэн байгуулагч, гишүүн байгууллагуудын хооронд хийгдсэн бизнесийн хэлцлийг улстөрчдийн хэрэгт хамаатуулан дүгнэлт гаргаж, бизнесийн нэр төрд нь халдаж байгааг буруушааж, эл мэдэгдлийг хүргүүлж байна. Монгол Улс хувийн хэвшилд тулгуурласан чөлөөт зах зээлтэй, эрх чөлөө, шударга ёсыг дээдэлсэн ардчилсан нийгмийн тогтолцоонд шилжээд 30 гаруй жил боллоо. Өнгөрсөн хугацаанд манай эдийн засгийн өсөлт, иргэдийн амьжиргаа, улсын төсөв санхүү, нийгмийн хөгжил бүгд хувийн хэвшлийн идэвхтэй оролцоо, хөрөнгө оруулагчдын итгэл, зүтгэл, шударгаар өрсөлдөх боломжийг олгодог төр засгийн тогтвортой, тууштай бодлогын харилцан шүтэлцээ, тэнцвэр дээр тогтдог гэдгийг нийтээрээ хүлээн зөвшөөрдөг болсон билээ. Харамсалтай нь компаниуд Монгол Улсын хуулийн хүрээнд бие даасан шийдвэр гарган хэлэлцээр хийж, бизнесийн гэрээ байгуулан хамтран ажилласныг буруутган, үүнийг бизнесийн ердийн үйл ажиллагаанд огт хамааралгүй улс төрчдийн харилцаатай хольж хутган нийгэмд томоохон компаниудын нэр хүндийг унагаан, хувийн хэвшил, бизнес эрхлэгчдийн бие даан ажиллах эрхэд нь халдаж байгааг хувийн хэвшлийн төлөөлөл бид дуу нэгтэйгээр эсэргүүцэж байна. Монгол Улсын эдийн засгийн дархлааг сайжруулах, өрсөлдөх чадварыг дээшлүүлэх, хууль эрх зүйн тунгалаг, шударга орчныг бүрдүүлэх ажилд манай гишүүд, хувийн хэвшлийнхэн идэвхтэй байр сууринаас оролцоход бэлэн байгаа бөгөөд төр ба хувийн хэвшлийн хэлцэл хийх механизмыг бататган байнгын ажиллагаатай болгох саналыг хүргүүлж байна. Баялаг бүтээгч, татвар төлөгч, ажил олгогч, Монгол Улсын нийгмийн хөгжлийн хөдөлгүүр, эдийн засгийн өрсөлдөх чадварыг тодорхойлогч гол хүчин болох бизнес эрхлэгчид болон компаниудын нэр хүнд, тэдгээрийн эрхийг хамгаалах чиглэлд хамтран ажиллахыг төр засгийн удирдлагууддаа уриалж байна. Хууль иргэн бүрт тэгш үйлчилж, шүүх шударга үнэнийг тогтоодог гэдэг итгэл үнэмшил нийгэмд бат бэх оршиж байж бид нийтээрээ илүү хурдтай өсөн дэвжиж, баян чинээлэг иргэдтэй, хөгжилтэй улсын жишигт хүрэх болно гэдэгт бид гүнээ итгэж байна. Улаанбаатар хотын Худалдааны танхим, СЕО клуб

Бизнесийг дэмжигч байгууллагууд хамтарч МЭДЭГДЭЛ гаргалаа.